Dechrau Arni
Dylai bwydo ar y fron fod yn GYFFORDDUS
Gall sut rydych chi’n eistedd (neu’n gorwedd) a pha mor agos rydych chi’n dal eich baban wrth i chi fwydo wneud gwahaniaeth i ba mor dda mae pethau’n mynd. Weithiau gall ychydig o wahaniaeth yn y ffordd y mae eich baban yn bwydo wneud gwahaniaeth mawr i ba mor gyfforddus ydych chi wrth fwydo a pha mor hawdd y mae eich baban yn cael eich llaeth.
Ddylai bwydo ar y fron DDIM BRIFO
Gall newid sut rydych chi’n dal eich baban a sut mae’r baban yn dechrau bwydo wneud gwahaniaeth o ran sut mae’n setlo ar ôl bwydo.
Yn aml, gelwir y ffordd rydych chi’n dal eich baban yn safle.
Weithiau gelwir y ffordd y mae eich baban yn cymryd y fron yn cydio yn y deth neu gysylltu.
Gall safle da helpu i wneud y broses o GYSYLLTU neu GYDIO yn un fwy effeithiol a chyfforddus. Dyma sut:
Mae angen i’ch baban allu cymryd darn sylweddol o’r fron yn ei geg a bwydo’n effeithiol heb achosi unrhyw anghysur i chi.
Yn y dyddiau cynnar yn benodol, efallai y byddwch chi’n fwy cyfforddus yn bwydo wrth led-orwedd, gyda’ch corff a’ch pen wedi’u cynnal yn llwyr. Yn y safle hwn, mae eich baban yn bwydo wrth orwedd ar eich stumog gyda’i goesau wedi’u plygu yn y pen-glin. Fel hyn gall eich baban symud tuag at eich teth a’ch bron ar ei ben ei hun, gyda rhywfaint o arweiniad ysgafn os oes angen. Fel arall, efallai y bydd yn well gennych chi fwydo ar y fron wrth eistedd gyda’ch baban yn gorwedd ar draws eich corff neu mewn gafael rygbi.
- Eisteddwch yn gyfforddus gyda’ch cefn wedi’i gynnal yn dda a’ch traed yn wastad ar y llawr neu wedi’u codi ar stôl neu flwch fel bod eich glin yn wastad.
- Cadwch gorff eich baban mewn llinell syth gyda’i gorff cyfan yn eich wynebu ac yn eich cyffwrdd.
- Mae angen cynnal gwddf, ysgwyddau a chefn eich baban, ond dylech osgoi cyffwrdd â’i ben, fel y gall wyro ei ben yn ôl yn hawdd.
- Symudwch eich baban o’r rhigol bronnau tuag at eich teth.
- Gwnewch yn siŵr bod gwefus isaf a gên eich baban yn cysylltu â’ch bron yn gyntaf.
Arwyddion bod Baban wedi gosod ei hun yn Sownd yn Effeithiol
- Mae gan eich baban ddarn sylweddol o’r fron yn ei geg.
- Mae gên eich baban yn cyffwrdd yn gadarn â’ch bron.
- Mae ceg eich baban yn llydan agored.
- Os gallwch chi weld y croen tywyll o amgylch eich teth, dylech allu gweld mwy o groen tywyll uwchben gwefus uchaf eich baban nag o dan wefus isaf eich baban.
- Dyw e ddim yn brifo wrth i’ch baban fwydo (er y gall yr ychydig sugnadau cyntaf deimlo’n gryf).
- Ni ddylai fod unrhyw newid yn siâp neu liw eich teth ar ôl bwydo e.e. ni ddylai edrych fel siâp minlliw ac ni ddylid gallu gweld llinellau ar draws y deth.
- Mae bochau eich baban yn aros yn grwn wrth iddo sugno.
- Mae eich baban yn cymryd sugnadau hir ac yn llyncu mewn ffordd rythmig (mae’n normal i’ch baban oedi o bryd i’w gilydd).
- Mae eich baban yn gorffen bwydo ac yn dod oddi ar y fron ar ei ben ei hun.
- Gallwch chi glywed a gweld eich baban yn llyncu’r llaeth er y bydd yn cymryd seibiant weithiau.
- Mae’r baban yn cynhyrchu cewynnau gwlyb/trwm rheolaidd; dylai carthion (pŵ) fod yn feddal ac yn felyn o ddiwrnod 4/5 gyda 2 neu ragor o gewynnau budr y dydd gyda charthion o faint darn arian £2 o leiaf.
- O tua 6 wythnos bydd maint y carthion yn amrywio o ddydd i ddydd, yn aml bydd mwy ohono. Efallai na fydd eich baban yn cael cewyn budr bob dydd. Byddwch chi’n dod i adnabod patrwm eich baban.
Mae’r materion canlynol yn arwyddion posibl efallai y byddai’n beth da newid y ffordd y mae’r baban yn cydio yn y deth. Dydy’r pethau hyn ddim bob amser yn cael eu hachosi gan y ffordd y mae’r baban yn cydio yn y deth, ond mae’n werth ceisio addasu’r ffordd rydych chi’n dal eich baban ac yn dod ag ef tuag at y fron cyn ystyried unrhyw esboniadau eraill:
- Mae’r baban yn dechrau bwydo ac yna’n tynnu i ffwrdd
- Tethi wedi cracio neu’n boenus
- Mae’r baban yn methu setlo neu’n llawn colig
- Mae’r bronnau’n gollwng
- Mae’r baban yn brwydro yn erbyn y fron neu’n ei gwrthod
- Mae’r baban yn deffro’n aml yn y nos
- Mae gan y baban ben-ôl dolurus, carthion dyfrllyd neu wyrdd
- Ennill pwysau yn araf
- Dwythellau wedi’u blocio neu fastitis
- Mae trwyn y baban wedi’i rwystro gan fron y fam
- Cyfnodau bwydo aml a/neu hir iawn
Mae yna rai darluniau a rhagor o wybodaeth yn Off to the Best Start.
Os hoffech chi siarad am safle eich baban a’r broses o’i osod yn sownd neu gydio yn y deth yn fwy manwl, gallech chi gysylltu â’r Llinell Gymorth Genedlaethol ar gyfer Bwydo ar y Fron i siarad ag aelod o’r criw cofrestredig sy’n cynnig cefnogaeth Bwydo ar y Fron. Mae’r Llinell Gymorth Genedlaethol ar gyfer Bwydo ar y Fron ar gael 24 awr y dydd, 365 diwrnod y flwyddyn, ar 0300 100 0212, neu drwy’r cyfryngau cymdeithasol. Mae gwe-sgwrs ar gael hefyd.
Dyma rai dolenni i wefannau bwydo ar y fron allanol gyda lluniadau llinell a delweddau sy’n rhoi awgrymiadau ar sut i osod eich baban at y fron yn gywir:
- When Latching gan Jack Newman MD, FRCPC, IBCLC ac Edith Kernerman IBCLC
- Gwefan a chlipiau fideo Jack Newman
- Gwefan bwydo ar y fron y GIG
- Llyfrynnau gwybodaeth UNICEF – Baby Friendly Initiative Information (gyda delweddau) i’w lawrlwytho
- Gwybodaeth am fwydo gan ParentClub Scotland sy’n cynnwys gwybodaeth am dynnu llaeth â llaw
Siaradwch ag aelod o’r criw cofrestredig sy’n cynnig cefnogaeth Bwydo ar y Fron
Mae’r Llinell Gymorth Genedlaethol ar gyfer Bwydo ar y Fron ar gael 24 awr y dydd, 365 diwrnod y flwyddyn. Neu siaradwch â ni trwy we-sgwrs pan fydd ar gael.